काठमाडौं – राजनीतिक दलहरु पारदर्शी नभएको भन्दै आलोचना भइरहेका बेला कांग्रेसले आर्थिक सहयोग पारदर्शी बनाउन बैंक चन्दा संकलन गर्ने निर्णय गरेको छ। उसले बुधबारदेखि नै अनलाइनबाट सहयोग संकलन सुरु गरेको छ। सभापति सुशील कोइराला, वरिष्ठ नेता शेरबहादुर देउवा, उपसभापति रामचन्द्र पौडेलले बुधबार पार्टी केन्द्रीय कार्यालयमा पत्रकार सम्मेलन गर्दै पार्टीमा आएका सहयोगलाई पारदर्शी बनाउने प्रतिबद्धता जनाए ।
'कांग्रेसको सफलताले नै लोकतान्त्रिक संविधानको निर्माण भई देशको समुन्नति सुनिश्चित हुनेछ,' शीर्ष तीन नेताद्वारा हस्ताक्षरित विज्ञप्तिमा भनिएको छ, 'स्वदेश तथा प्रवासमा रहेका सम्पूर्ण शुभचिन्तक, समर्थक र सहयोगीहरुको महत्वपूर्ण सहयोगको अपेक्षा हामीले गरेका छौं।'
पार्टीले आर्थिक हिसाबकिताब विश्वसनीय, वैज्ञानिक र पारदर्शी बनाउन इन्टरनेट प्रविधिमार्फत चन्दा सकंलन खुला गरेको जनाएको छ। कांग्रेसले वाणिज्य, इन्भेस्टमेन्ट, ग्लोबल र ग्रान्ड बैंक तथा वेस्टर्न युनियन, मनिग्राम, हिमाल रेमिटलगायत दसवटा रेमिटमार्फत चुनावी सहयोग दिन सकिने उसले जनाएको छ।
आर्थिक सहयोग पठाउनका लागि डब्लुडब्लुडब्लु नेपालीकांग्रेस डटओआरजी वेभसाइटभित्र गई सहयोग लिंकमा क्लिक गरेपछि खुल्ने सहयोग फर्म भरेर सहयोगकर्ता र रकमको जानकारी प्रविष्ट गरी त्यसकै आधारमा बैंकमार्फत सहयोग पठाउन सकिनेछ।
रेमिटेन्समार्फत पठाउन चाहनेले भने त्यसको कोड पार्टी केन्द्रीय कार्यालयमा पठाउनुपर्नेछ। चन्दादाताले सहयोग रकम गोप्य राख्न चाहेका बाहेक सबैको नाम वेभसाइटमा प्रकाशित गरिने पनि जनाइएको छ।
सभापति कोइरालाले जहिले पनि चन्दा उठायो भनेर बदनामा गर्ने परिपाटीको अन्त्य गरी विश्वसनीय, पारदर्शी र जवाफदेही सहयोग संकलन सुरु गरेको बताए। 'पैसा उठाएर खायो भन्नेर कांग्रेसलाई सधैं बदनाम गर्ने काम भएको छ,' कोइरालाले भने, 'अब कसैलाई भन्ने ठाउँ दिँदैनौं।'
कोषाध्यक्ष चित्रलेखा यादवले खुला हृदयले पार्टीलाई आर्थिक सहयोग गर्न आग्रह गरिन्। 'बैंक खातामा सिधै सहयोग गर्न सकिन्छ, त्यस्तो सहयोग निर्वाचन तथा पार्टी परिचालनका लागि पूर्ण पारदर्शी रुपमा उपयोग हुने विश्वास दिलाउँछु,' उनले भनिन्।
उद्योग विभाग प्रमुख समेत रहेका केन्द्रीय सदस्य दीपकुमार उपाध्यायले पार्टीले खुला चन्दालाई निरुत्साहित गर्ने प्रयास सुरु गरेको बताए। 'निर्वाचनपछि हामी सबै विवरण सार्वजनिक गर्नेछौं,' उनले भने।
See more at: https://www.facebook.com/nepalinewss
-भिडियो हेर्नुस्:http://www.youtube.com/
No comments:
Post a Comment