भक्तपुर,
भाद्र ५ -
ट्राफिकले सवारी चेकिङमा लापरबाही गर्दा गठ्ठाघरमा सोमबार एक जनाको मृत्यु
भएको छ । 'चेकिङ' हुँदै छ भन्ने जानकारीमूलक बोर्ड नराखी सडकमा उभिएका
ट्राफिकले हात दिएको भरमा एक्कासि रोक्दा स्याङ्जा वालिङ ५ का सन्तोष भनिने
खिमबहादुर खड्काको दुर्घटनामा मृत्यु भएको हो । ट्राफिक प्रहरीले सवारीको कागजपत्र -बिलबुक, परमिट र लाइसेन्स) जाँचको नाममा जुनसुकै ठाउँमा सवारी रोकेर चेकिङ गर्ने गरेको छ । सोमबार दिउँसो गठ्ठाघरस्थित आकाशे पुलमुनि पनि त्यस्तै भएको थियो । खड्काले चलाएको बा३२प ३९६६ मोटरसाइकल बा२ख १४६२ नम्बरको मिनिट्रकमुनि छिरेको थियो । साँगास्थित शिवमूर्तिको अवलोकन गरेर र्फकंदा उनी दुर्घटनामा परेका हुन् । स्नातक सकाएर प्रमाणपत्र बनाउन १० दिनअघि काठमाडौं आएका उनी बानेश्वरस्थित शंकर खाँडको कोठामा बस्थे ।
ट्राफिकको लापरबाहीले दुर्घटना भएको भन्दै आफन्तले मंगलबार अपराह्नसम्म शव बुझेका थिएनन् । 'मेरो छोरो दुर्घटनामा पर्नुको कारण ट्राफिकले गर्दा भएको थाहा पाएपछि ठिमी प्रहरी कार्यालय गएको थिएँ,' मृतकका बुवा चित्रबहादुरले भने, 'ट्राफिकलाई कारबाही हुन्छ, शव बुझिदिनुस् भनेर पठायो ।'
ट्राफिकको गल्तीले आफ्नो छोराजस्तै अरूले ज्यान गुमाउन नपरोस् भनेर कारबाही नभएसम्म शव नबुझ्ने अडान लिएको उनले बताए । ट्राफिकको गल्तीले दुर्घटना भएपछि ट्राफिक प्रहरी प्रभाग गठ्ठाघरका इन्चार्जलाई बग्गीखानामा तानिएको छ ।
घुम्न गएका मृतक खड्काका साथी शंकर खाँड अर्को मोटरसाइकलमा आउँदै थिए । गठ्ठाघरको ट्राफिक लाइट पार गरेर अगाडि बढ्दा दुर्घटनामा साथी ढलेको अवस्थामा देखेपछि उनी पनि बेहोस भएका थिए ।
'म घटनास्थल पुग्दा ट्रकको चक्कामुनि छिरेको रहेछ,' खाँडले भने, 'छेउमै रहेको ट्राफिकले केही गरेको रहेनछ ।' आफ्नो कारणले दुर्घटना भएपछि ट्राफिक पनि चेकिङ नभएको भन्दै पन्छिएको ट्रकका चालक कुलबहादुर शाक्यले बताए । चेकिङका क्रममा ट्राफिकले सावधानी नअपनाउँदा दुर्घटना भएको उनले बताए । 'सडकको बीचमा रहेको ट्राफिकले हात दिँदै रोक्न भन्यो, मैले साइड लगाएँ,' उनले भने, 'यही बेला पछाडिबाट आएको मोटरसाइकल मेरो गाडीको टायरमुनि छिरिसकेको रहेछ । थाहै भएन ।' प्रहरीले ठक्कर दिएको कागजी प्रक्रिया पुर्याएर उल्टै ट्रक चालकमाथि मुद्दा चलाउने तयारी गरेको छ ।
महानगरीय ट्राफिक प्रहरी महाशाखाका वरिष्ठ प्रहरी उपरीक्षक राजेन्द्र श्रेष्ठले तीव्र गतिमा आएको मोटरसाइकल ट्राफिक चेकिङबाट भाग्न खोज्दा ट्रकमुनि छिरेर दुर्घटना भएको बताए । ट्राफिकको गल्तीले दुर्घटना नभएको दाबी गर्दै उनले भने, 'चेकिङ हुने सबै ठाउँमा सूचना बोर्ड राख्न सकिँदैन । कतिपय स्थानमा बोर्ड नराखी चेकिङमा गर्नुपर्ने हुन्छ ।' तीव्र गतिकै कारण दुर्घटना भएको बताए पनि गति मापन गर्ने 'राडर गन' प्रयोग गरेर कारबाही नहुनुले ट्राफिकले देखावटी काम गर्ने गरेको देखिन्छ ।
गठ्ठाघरमा मात्रै होइन, ट्राफिक प्रहरीको लापरबाहीले उपत्यकाका अन्य स्थानमा पनि यस्ता घटना हुने गरेको छ । कुन परिसर, वृत्त, प्रभागले कति कारबाही गर्यो ? त्यसको आधारमा मूल्यांकन हुने भएपछि सामान्य गल्तीमा पनि जरिवाना गर्ने गरिएको छ । जरिवाना गरेको १५ प्रतिशत ट्राफिकले पाउने भएपछि कारबाहीलाई तीव्रता दिएको व्यवसायीहरूको आरोप छ ।
ट्राफिकले चेकिङ गर्दा मृत्यु भएपछि मात्रै यो घटना बाहिर आएको हो । यस्ता घटना रातिको समयमा मापसे चेकिङमा बढी हुने गरेको सर्वसाधारणको गुनासो छ । चेकिङ छलेर भाग्न खोजेको भन्दै मोटरसाइकलमा सवार व्यक्तिलाई समाउन खोज्दा दुर्घटना हुने गरेको छ । एक वर्षअघि भक्तपुरमा दुई जनाको यस्तै घटनामा मृत्यु भएको थियो । एक 'स्टप'बाट भाग्यो भने अर्को 'स्टप'मा नियन्त्रण गर्ने संयन्त्र भए पनि जबरजस्ती गर्दा यस्ता दुर्घटना हुने गरेको छ । कतिपय स्थानमा त सडकको बीच भागमै चेकिङ हुने गरेको छ ।
प्रकाशित मिति: २०७० भाद्र ५
- See more at: http://ekantipur.com/np/2070/5/5/full-story/374340.html#sthash.dKBLrkVq.dpuf
