निगमको जहाज आयो २५ दिन ढिलो आउँदा १७ करोड गुम्यो

काठमाडौ, श्रावण २१ - नेपाल वायुसेवा निगमले सिचेकका लागि पठाएको बोइङ निर्धारित मितिभन्दा दोब्बर समयले ढिलो आएको छ । मर्मतका लागि सिंगापुर पठाइएको जहाज २६ दिनमा आइपुग्नुपर्नेमा ५० दिनमा आउन लागेको हो । जहाज आइतबार राति ११ बजे त्रिभुवन अन्तर्राष्ट्रिय विमानस्थलमा अवतरण गर्दै छ ।
मर्मत कम्पनी एसटी एरोस्पेससँग २६ दिनमा मर्मत सक्ने सम्झौता भएको थियो । निगमले गत जेठ ३१ गते मर्मतका लागि सिंगापुर पठाएको थियो । तर समयमा पैसा नपाएको भन्दै मर्मत कम्पनीले बीचमै काम रोकेर निगमसँग अड्को थापेको
थियो । यसले निगमको १७ करोड रुपैयाँभन्दा बढी आम्दानी गुमेको छ ।
'मर्मतमा ढिलाइ भएकाले निगमले २५ दिनको आम्दानी गुमाएको छ,' स्रोतले भन्यो, 'पैसा पठाउने समयमा मुख्य अधिकारी काठमाडौंबाहिर भएकाले नोक्सानीको जिम्मेवारी उनीहरूले लिनुपर्छ ।' निगमको एउटा बोइङले दैनिक ६० देखि ७० लाख रुपैयाँ आम्दानी गर्छ ।
सिंगापुरबाट मर्मत पूरा भई मलेसियाका यात्रु बोकेर निगमको जहाज आइतबार राति काठमाडौं आउँदै छ । सोमबारदेखि कटौती गरिएको उडान थप गरेर सेवा सञ्चालन गर्ने प्रवक्ता गणेशबहादुर चन्दले जानकारी दिए ।
अन्तर्राष्ट्रिय उडान गर्ने दुई बोइङमध्ये एक सिचेकमा पठाएपछि निगमले मलेसिया र हङकङ उडान घटाएको थियो । निगमले चार गन्तव्यमा साताको १६ उडान गर्दै आएको छ ।
मर्मतको रकम पठाउन सुरुमा १७ करोड ८६ लाखको प्रतीतपत्र खुला गरे पनि बैंकिङ प्रक्रियाका कारण ढिलो भएको थियो । पैसा पठाउन ढिला भएपछि मर्मत कम्पनीले डेलिभरी गर्न मानेन । त्यति बेला परीक्षण उडान तालिकासमेत रद्द भएको थियो । यसले गर्दा सिंगापुर पुगेका जहाजका क्रु, इन्जिनियरसहित १३ कर्मचारी त्यसै र्फकनुपरेको थियो ।
निगमले यसपालि एरोस्पेसलाई दुई वर्षका लागि जहाज मर्मतका लागि छनोट गरेको हो । यसअघि इजरायलको एलाल कम्पनीसँग निगमले जहाज मर्मत गराउँदै आएको थियो ।
एरोस्पेसले एलालभन्दा १२ लाख डलर सस्तोमा मर्मत गरिदिने भन्दै प्रस्ताव हालेको थियो । 'उसले निगमलाई विश्वास नगरी डेलिभरीमा ढिलो गर्नाले जति सस्तोमा मर्मत गर्ने भनेको थियो, उति नै आम्दानी गुमाइदिएको छ,' स्रोतले भन्यो, 'त्यसमाथि जहाज डेलिभरी गरेको २० दिनमा तिरे हुने ओभरहेड लागत पनि पहिल्यै माग्यो ।' निगमले फेरि सेप्टेम्बर अन्तिमतिर अर्को बोइङ सिचेकमा पठाउनुपर्ने भएको छ ।


प्रकाशित मिति: २०७० श्रावण २१

See more at: https://www.facebook.com/nepalinewss
-भिडियो हेर्नुस्:http://www.youtube.com/watch?v=xmpNPgUvoxY