-भिडियो हेर्नुस्:http://www.youtube.com/
काठमाडौं, भाद्र १९ - एमाओवादीले संविधानका मुद्दा मिल्ने दलहरूसँग संविधानसभा निर्वाचनमा तालमेल गर्ने भएको छ ।
उसले उपेन्द्र यादव नेतृत्वको मधेसी जनअधिकार फोरमसँगको तालमेललाई पहिलो नम्बरमा राखेको छ । त्यसपछि अशोक राई नेतृत्वको संघीय समाजवादी पार्टी छ । अघिल्लो संविधानसभा निर्वाचनमा एजेन्डा मिल्ने दलहरूसँग दुई तिहाइ बहुमत नभएकाले संविधान नबनेको भन्दै तालमेल प्रयास थालेको उसको दाबी छ ।
अध्यक्ष पुष्पकमल दाहालले मंगलबार ललितपुर बालकुमारी खन्ना गार्मेन्टमा कार्यकर्तालाई प्रशिक्षण दिँदै एजेन्डा मिल्ने दलहरूसँग तालमेल गरेर जाने बताए । 'सिट एड्जस्टमेन्ट भयो भने हामी दुई तिहाइ ल्याउँछौं,' उनको दाबी थियो, 'त्यसो भयो भने पहिचानसहितको संघीयता र संघीयतासहितको संविधान बन्छ ।'
मधेसलाई 'विशेष' महत्त्व दिएको एमाओवादीले फोरमसँग तालमेल गर्दा सहज हुने विश्लेषण गरेको छ । 'तालमेलका लागि उपेन्द्रजी सबैभन्दा नजिक हुनुहुन्छ,' एमाओवादी प्रवक्ता अग्नि सापकोटाले भने, 'त्यसपछि अशोकजीको समाजवादी पार्टीसँग हुन्छ ।' उनले मोहन वैद्यले नेतृत्व गरेको नेकपा-माओवादीले निर्वाचनमा भाग लिए तालमेलका लागि पहिलो नम्बरमा आउने बताए । समाजवादीसँग तालमेलका लागि यसअघि नै एमाओवादीले वार्ता गरिसकेको छ ।
फोरम नेपालले मधेसी दलसँग भन्दा एमाओवादीसँग चुनावी सहकार्य गर्दा बढी सिट हात पार्न सकिने निष्कर्ष निकालेको छ । पार्टी केन्द्रीय समितिको सोमबार सम्पन्न
बैठकले मधेसमा आफ्नो पकड विगतको जस्तै रहेको भन्दै ठूलो पार्टी एमाओवादीसँग सहकार्य गरे ४० देखि ५० सिट हात पार्न सकिने निष्कर्ष निकालेको हो ।
अघिल्लो चुनावमा जितेका निर्वाचन क्षेत्रमा अहिले पनि आफ्नै पकड रहेको फोरमको तीनदिने बैठकको निष्कर्ष
छ । अघिल्लो चुनावमा फोरमले ३२ निर्वाचन क्षेत्रमा जितेको थियो । अहिले भने फोरमबाटै फुटेर तीनवटा पार्टी बनेका छन् ।
शनिबारदेखि जारी केन्द्रीय समिति बैठकमा अधिकांश केन्द्रीय सदस्यले एमाओवादी ठूलो पार्टी भएकाले उसैसँग सहकार्य गरेर जानुपर्नेमा जोड दिएको एक नेताले बताए ।
यद्यपि एमाओवादीसँगै सहकार्य गर्ने औपचारिक निर्णय भने केन्द्रीय समितिबाट हुन सकेन । चुनावमा कोसँग सहकार्य गर्ने भन्नेमा एकमत हुन नसकेपछि फोरमले सहकार्यलाई 'खुला नै राख्ने' औपचारिक निर्णय गरेको छ । सबै दलसँग वार्ता गर्न सकिने भनी फोरमले निर्णय गरेको
छ । तराई/मधेसका १ सय १६ निर्वाचन क्षेत्रमध्ये आधाभन्दा बढीमा फोरमले जित्ने दाबी गरेको छ । बैठकमा विभिन्न जिल्ला र निर्वाचन क्षेत्रमा पार्टीको अवस्थाबारे विस्तृत छलफल भएको थियो । एमाओवादी अध्यक्ष दाहालले पनि उपेन्द्र यादवलाई चुनावमा भाग लिन विभिन्न समयमा गरेको गोप्य वार्ताका क्रममा चुनावी सहकार्यबारे छलफल गरिसकेका छन् ।
अधिकांशले ठूलो पार्टीसँगको सहकार्यमा जोड दिएकाले फोरम नेपालले मधेसी दलसँग सहकार्य गर्ने सम्भावना न्यून बन्दै गएको छ । 'गच्छदार र महन्थजीको पार्टीसँग सहकार्य हुने सम्भावना न्यून छ,' फोरम उपाध्यक्ष मोहम्मद लालबाबुले भने, 'यद्यपि सहकार्यबारे उनीहरू र विचार तथा मुद्दा मिल्ने अरू दलसँग पनि वार्ता गर्न सकिन्छ ।'
वार्ता गर्न फोरमले वरिष्ठ नेता भरतविमल यादवको नेतृत्वमा समिति बनाएको छ । एमाओवादीले विजय गच्छदार र अन्य दलसँग पनि तालमेल हुन सक्ने बताएको छ । मधेसी दलभन्दा एमाओवादीसँग सहकार्य फोरम नेपालले प्राथमिकतामा राखेपछि चुनावमा मधेसी दलहरू दुई शक्ति हुने भएका छन् । उपेन्द्र यादव नेतृत्वको एक र गच्छदार-ठाकुर- महतो रहेको अर्को चुनावी मोर्चा बन्ने सम्भावना बढेको छ । पछिल्लो समयमा कमजोर बन्दै गएको महेन्द्र राय यादव नेतृत्वको तमलोपा नेपाल, एक्लिएका राजकिशोर यादव र अनिलकुमार झाले चुनावी एकताबारे गन्तव्य प्रस्ट पारिसकेका छैनन् । शरतसिंह भण्डारी नेतृत्वको राष्ट्रिय मधेस समाजवादी पार्टी -रामसपा) भने यादवको दलसमेत आबद्ध 'संघीय लोकतान्त्रिक मोर्चा' मै छ ।
'फेरि ६०१'
काठमाडौं- उच्चस्तरीय राजनीतिक समितिले नेकपा- माओवादी र संघीय समाजवादी पार्टीलाई निर्वाचन प्रक्रियामा ल्याउन आगामी संविधानसभा सदस्यको संख्या पनि ६०१ नै बनाउने सैद्धान्तिक सहमति गरेको छ ।
यसअघि ६०१ मा जान नहुने अडान राखेको एमालेले मंगलबार सहमति जनाएको थियो । एमालेले केन्द्रीय समिति बैठकबाटै अशोक राई नेतृत्वको समाजवादी पार्टी निर्वाचनमा आउने भए ६०१ मा जान सकिने निर्णय गरेको जानकारी बैठकमा गराएको थियो । यसअघि समितिले उपेन्द्र यादव नेतृत्वको संघीय लोकतान्त्रिक मोर्चासँग संविधानसभाको संख्या ५८५ पुर्याउने सहमति गरेको थियो । संघीय समाजवादीले ६०१ मै जानुपर्ने अडान राख्दै आएको थियो ।
एमाओवादी नेता नारायणकाजी श्रेष्ठका अनुसार समितिमा भएको सहमतिबारे यादव नेतृत्वको मोर्चासँगको छलफलपछि समाजवादीसँग औपचारिक वार्ता गरिने छ । बैठकले नेकपा-माओवादीसँग पनि अनौपचारिक वार्ता गरेर दुई दिनभित्र निर्वाचन प्रक्रियामा ल्याउन अन्तिम प्रयास गर्ने निर्णय गरेको छ ।
प्रकाशित मिति: २०७० भाद्र १९
प्रकाशित मिति: २०७० भाद्र १९
No comments:
Post a Comment