» अर्थ / वाणिज्य » देश बन्दरगाह विस्तारमा अवरोध

चौतारा, श्रावण १० - चीनको सहयोगमा तातोपानीको लार्चामा निर्माण भइरहेको सुख्खा बन्दरगाह जोड्ने सडक विस्तारमा अवरोध भएको छ । चिनियाँ मालवाहक कन्टेनर सीधै लार्चा ल्याएर व्यापार सहज बनाउने राणनीतिअनुरूप मितेरीपुल पश्चिम ६ दशमलव ५ किमि सडकलाई कम्तीमा १५ मिटर चौडा बनाउने सम्झौता बमोजिम गत मंसिरदेखि आधुनिक सुख्खा बन्दरगाह निर्माण भइरहेको छ ।

स्थानीयको विरोधका कारण सडक डिभिजन कार्यालय चरिकोटले अरनिको राजमार्ग चौडा अभियान स्थगित गरेपछि सुख्खा बन्दर्गाह जोड्ने सडक निर्माण नहुने सम्भावना बढेको हो । बन्दरगाह र सडक निर्माणका लागि सरकारका तर्फबाट नेपाल इन्टरमोडल यातायात विकास समिति र बेइजिङ रियल स्टेट ग्रुप कम्पनीबीच ०१२ मे १७ मा सम्झौता भएको थियो । बन्दरगाहको रेखदेख तथा निर्माणपछिको व्यवस्थापन इन्टरमोडेलले गर्ने योजना छ । २६ महिनामा पूरा गर्ने लक्ष्य अनुरूप रियल स्टेट ग्रुपले बन्दरगाह निर्माण सुरु गरेको ९ महिना बिते पनि सडकको काम सुरु भएको छैन । स्रोतका अनुसार घरटहरा नहटाए सडक विस्तार नगर्ने मनस्थितिमा चिनियाँ पक्ष पुगेको छ । काम गर्न सहज वातावरण बनाउने जिम्मेवारी सरकारको हो, सडकका एक उच्च अधिकारीले भने, अन्यथा चिनियाँले सडक नबनाए पनि यसलाई स्वभाविक मान्नुपर्छ । सडक विस्तार नगरे मालवाहक कन्टेनर तातोपानी प्रवेश गर्न सक्दैनन् । राजमार्ग आसपासका त्रासिन्दाले धनीपूर्जा भएका घरजग्गा मालिकलाई मुआब्जा दिनुपर्ने माग गर्दै आन्दोलन गरेपछि सडक चौडा अभियान स्थगित गरिएको थियो ।

 चीनसँगको प्रमुख उत्तरी नाकाबाट तातोपानीबाट हुने आयात-निर्यात व्यापारलाई सहज बनाउन नेपाल सरकारको अनुरोधमा १ सय ५८ वटा कन्टेनर तथा ३५ वटा साना गाडी अट्ने संरचनासहितको बन्दरगाह निर्माण गर्न लागिएको हो । सहज वातावरण तयार नगरे चिनियाँ पक्षले सडक बनाउँदैनन्, इन्टरमोडलका कार्यकारी निर्देशक शरदविक्रम राणाले भने, उनीहरू त्यसै पनि केरुङ नाकातिर आकषिर्त छन् । हामी तयार भएनौं भने उनीहरूले गर्दैनन् । अरनिको राजमार्गलाई एसियाली स्तरको राजमार्ग बनाउने चर्चा चलिरहेका बेला यस्ता गतिविधिले स्थानीय विकासमा बाधा पुग्छ ।

प्रकाशित मिति: २०७० श्रावण १०

- See more at: https://www.facebook.com/nepalinewss
-popular video: http://www.youtube.com/watch?v=xmpNPgUvoxY