काठमाडौ, असार २६ - भारतीय विदेशमन्त्री सलमान खुर्सिदले कुनै पनि मूल्यमा तोकिएको मितिमै संविधानसभा निर्वाचन गर्न आग्रह गरेका छन् । औपचारिक भेटघाटका साथै लामबद्ध भई भेट्न गएका नेपाली नेताहरूसँगको कुराकानीमा खुर्सिदले संविधानसभा चुनाव हुनुपर्ने भारतीय सन्देशलाई यथेष्ट प्रस्ट पारे । सबै मिलेर सम्झाउँदा समेत असन्तुष्ट पक्षहरू नमाने पनि चुनाव रोक्न नहुने उनको संकेत थियो ।
नौ घन्टे भ्रमण दौरान दुई पटक सञ्चारमाध्यमसँग कुरा गर्दै खुर्सिदले 'सबै पक्ष प्रक्रियामा गए चुनाव राम्रो हुने' धारणा राख्दै 'यतिबेला सबैले सकारात्मक भाषा बोलिरहेको हुनाले भारतले त्यसैलाई प्रोत्साहन गर्ने' बताए ।
उनले संविधानसभाका लागि दोस्रोचोटि चुनाव हुन गइरहनुलाई 'युनिक' परीक्षण भन्दै यसबाट संविधान लेखन, शान्ति र विकासका लागि मार्ग खोल्नुपर्ने बताए ।
भारतीय सहजीकरणमै भएको दिल्ली सम्झौताको जगबाट सुरु भएको नयाँ राजनीतिक प्रक्रियाले केही समय लगाएर भए पनि राम्रो नतिजा निकाल्ने विश्वास उनले व्यक्त गरे । 'हरेक राम्रो चिजले समय लिन्छ, जस्तो उत्कृष्ट वाइन बन्न पनि त वर्षौं लाग्छ,' निकै उत्साहित देखिएका उनले भने, 'एउटा मुलुकको भविष्य निर्माण गर्ने कुरामा केही वर्ष बढी लाग्नु ठूलो विषय होइन ।'
खुर्सिदले नेपाल आउनेबित्तिकै परराष्ट्र तथा गृहमन्त्री माधव घिमिरेसँग वार्ता गरेका थिए । सोही क्रममा दुई पक्षबीच चुनावका लागि भारतले ७ सय ६४ वटा गाडी अनुदानस्वरूप दिने सम्झौतामा हस्ताक्षर भयो । सुरक्षा निकायका लागि ७ सय १६ र निवार्चन आयोगका लागि ४८ वटा गाडीका सम्झौता हस्तान्तरण गरिए । यो अनुदान सहयोग ८० करोड रुपैयाँ बराबरको हुनेछ ।
खुर्सिदले सञ्चारमाध्यमसँग बोल्ने क्रममा 'चुनाव निम्ति अन्य कुनै सहयोग आवश्यक परे र नेपाल सरकारले अनुरोध गरेमा भारतले क्षमताले भ्याएसम्म उपलब्ध गराउने' पटक-पटक दोहोर्याए । उनले नेपालमा चुनाव घोषणा भएपछि नै भ्रमणको उत्साहपूर्वक तयारी गरेको उल्लेख गरे ।
चिनियाँ स्टेट काउन्सिलर याङ जेइचीले दुई दिने नेपाल भ्रमण गरेको दुई सातापछि खुर्सिद 'चुनावी ऐक्यबद्धता' निम्ति आएका हुन् । उनले राष्ट्रपति रामवरण यादव र अन्तरिम मन्त्रिपरिषद्का अध्यक्ष खिलराज रेग्मीसँग पनि शिष्टाचार भेट गरे ।
यसैबीच खुर्सिद-घिमिरे वार्तामा द्विपक्षीय व्यापार सहजीकरण, डुवान क्षेत्रको खतरा न्यूनीकरण गर्न द्विपक्षीय संयन्त्रबाट काम गर्ने र प्रहरी प्रतिष्ठानका लागि दुवैतर्फका कानुनी प्रक्रिया पूरा गर्ने सहमति भएका छन् । यसैगरी नेपालले पशुपतिनगर र रूपन्देही तथा भारतले आफ्नैतर्फका सीमावर्ती क्षेत्रमा अध्यागमन जाँच कार्यालय खोल्ने विषयले पनि प्रवेश पाएको परराष्ट्र मन्त्रालयका प्रवक्ता अर्जुनबहादुर थापाले बताए ।
उनका अनुसार वार्ता दौरान भारतले सुपुर्दगी सन्धिको एजेन्डा पनि सदाझैं प्रस्तुत गरेको थियो ।
पशुपतिनगर र रूपन्देहीको सीमावर्ती क्षेत्रमा अध्यागमन जाँच कार्यालय खोल्ने यसअघिको द्विपक्षीय गृहसचिवस्तरीय वार्ताको सहमति कार्यान्वयन नगराउन सोमबार मात्रै सर्वोच्च अदालतले आदेश दिएको हो ।
नेताहरूको लर्को थोरै समयमा दर्जनौं नेपाली नेतालाई एकै ठाउँमा आलोपालो भेटेर खुर्सिदले नेपाली राजनीतिलाई तरंगित बनाए । राजधानीको द्वारिकाज होटलमा उनले एमाओवादी अध्यक्ष पुष्पकमल दाहालसहित स्थायी समितिका सबैजसो सदस्य, कांग्रेसका वरिष्ठ नेता शेरबहादुर देउवासहित प्रभावशाली केन्द्रीय नेताहरू, एमाले अध्यक्ष झलनाथ खनालसहित तीन नेता र मधेसी पार्टीहरूका सबैजसो मुख्य नेतालाई पालैपालो भेटे ।
चुनाव बहिष्कारकै नीतिमा रहेको मधेसी जनअधिकार फोरमका अध्यक्ष उपेन्द्र यादव पनि भेट्न गएका थिए ।
चुनाव बहिष्कार नीतिमा रहेको नेकपा-माओवादीका कोही पनि खुर्सिदलाई भेट्न गएनन् । उक्त पार्टीका अध्यक्ष मोहन वैद्य सोमबार चीन भ्रमणमा गएका थिए । एमाओवादी अध्यक्ष दाहाल खुर्सिदलाई भेट्नै भनेर सिंगापुर भ्रमण छोट्याएर मंगलबार फिरेका थिए ।
होटलको भेटघाटअघि खुर्सिदको सम्मानमा घिमिरेले आयोजना गरेको दिवाभोजमा राष्ट्रिय प्रजातन्त्र पार्टीका नेताहरू पनि उपस्थित थिए ।
खुर्सिदले आफूले नेपाली नेताहरूकै आग्रह र चाहनामा भेटेको बताए । नेपाल र भारतका नेताहरूबीच भेटघाटका लागि कुनै निम्तो जरुरी नपर्ने बताए ।
भारतले मात्र स्थायित्व दिनसक्छ ः सिटौला
खुर्सिदसँगको भेटवार्तापछि नेपाली नेताहरू आ-आफ्नै विवरण र विश्लेषण दिइरहेका थिए । नेपाली कांग्रेसका केन्द्रीय नेता कृष्ण सिटौलाले भारतले मात्र नेपालमा राजनीतिक स्थायित्व दिनसक्ने बताए । 'स्थायित्वपूर्ण नेपाल र भारतबीच मात्र राम्रो सम्बन्ध हुनसक्छ,' उनले थपे ।
यसैगरी एमाओवादी नेता राम कार्कीले वैद्य पक्षले वार्ता टोली बनाएकोप्रति खुर्सिदले खुसी व्यक्त गरेको उल्लेख गरे । 'उहाँहरूलाई पनि जानकारी भएको रहेछ यो कुरा,' उनले भने । एमाले अध्यक्ष खनालले भारत कुनै मूल्यमा नेपालमा चुनाव चाहन्छ भन्ने खुर्सिदले बताएको उल्लेख गरे ।
प्रकाशित मिति: २०७० असार २६
- See more at: https://www.facebook.com/nepalinewsshttp://www.youtube.com/watch?v=xmpNPgUvoxY
No comments:
Post a Comment