काठमाडौ, असार २६ - मेलम्ची खानेपानी आयोजनाको सुरुङ मार्ग र पानी प्रशोधन संरचना निर्माणका लागि छनोट भएका दुई अन्तर्राष्ट्रिय ठेकेदार कम्पनीले आफ्नो देशमा समेत सम्बन्ध भएका नेपाली बैंकमा परफरमेन्स बन्ड (काउन्टर जमानत) राख्ने भएका छन् ।
चिनियाँ ठेकेदारसितको ठेक्का रद्द भएको एक वर्षसम्म उसले काउन्टर र पेस्कीको जमानत उठ्न नसकेपछि आयोजनाकै आग्रहमा ती दुई कम्पनीले दुवैतिर सम्बन्ध भएका बैंक रोजेका हुन् ।
मेलम्चीबाट साढे २७ किलोमिटर सुरुङ निर्माण गरी दैनिक ल्याइने १७ करोड लिटर पानी प्रशोधन गर्न सुन्दरीजलमा बनाइने केन्द्रको ठेक्का पाएको अस्टि्रयाको भिएटेक डब्लूएबीएजी लिमिटेड र भारतको प्रतिभा इन्डस्ट्री लिमिटेडको संयुक्त लगानी छ । उक्त कम्पनीले स्टेट बैंक अफ इन्डियाको लगानी रहेको एसबीआई बैंक नेपालमा परफरमेन्स बन्ड राखेको छ । सुरुङ मार्गको ठेक्का पाएको इटालियन कम्पनी सीएमसीले पनि स्टान्डर्ड चार्टर्ड बैंक या आफ्नो मुलुकको बैंकसित बैंकिङ सम्बन्ध भएको नेपाली बैंकमा परफरमेन्स बन्ड राख्ने भएको छ । बेलायतमा मुख्यालय रहेको स्टान्डर्ड चार्टर्ड बैंकको इटालीमा समेत शाखा छ ।
सुरुङ मार्ग निर्माणको यसअघिको ठेकेदार चिनियाँ कम्पनीले दुई नेपाली बैंकमा राखेको काउन्टर तथा एडभान्स जमानतबापतको डेढ अर्ब रुपैयाँ ठेक्का तोडिएपछि दिएको छैन । सोही कारणले काउन्टर ग्यारेन्टी बसेका दुई नेपाली बैंकले भुक्तानी दिन सकेका छैनन । फेरि सोही समस्या दोहोरिन नदिन दुवैतिर पहुँच भएका बैंक खोजिएको सहरी विकास मन्त्रालयका एक अधिकारीले बताए । यसबाट ठेकेदारलाई समेत सजिलो हुने उनले बताए ।
मेलम्ची खानेपानी विकास समितिले दुई नेपाली बैंकबाट ठेक्का रद्द भई जरिवानामा परेको चिनियाँ ठेकेदार कम्पनीले राखेको परफरमेन्स बन्ड तथा एडभान्स जमानतबापतको करिब डेढ अर्ब रुपैयाँ एक वर्षदेखि पाउन सकेको छैन । उसले ती बैंकबाट उक्त रकम आफूलाई दिलाइदिन राष्ट्र बैंकलाई डेढ महिनाअघि आग्रह गरे पनि अहिलेसम्म भुक्तानी पाएको छैन । जफत गरिएको ठेकेदारको बैंक ग्यारेन्टीबापतको रकम बैंक अफ काठमाडौंमा करिब ७६ करोड २० लाख र हिमालयन बैंकमा झन्डै ५९ करोड ४० रुपैयाँ छ । जमानत बसेको चिनियाँ बैंकले रकम नदिएपछि उनीहरूले आयोजनालाई भुक्तानी दिएका छैनन् ।
पानी प्रशोधन केन्द्रको ठेक्का पाएको अस्टि्रयाको भिएटेक डब्लूएबीएजी लिमिटेड र भारतको प्रतिभा इन्डस्ट्री लिमिटेडको जोइन्ट भेन्चरले कुल ठेक्का रकमको १० प्रतिशत अर्थात ४२ करोड रुपैयाँको काउन्टर बैंक जमानत भारतीय लगानी रहेको एसबीआई बैंकमा राखेको छ । उक्त कम्पनीले ४ अर्ब २० करोड रुपैयाँमा जापानीस्तरको पानी प्रशोधन संरचना निर्माण गर्ने ठेक्का पाएको छ । मेलम्ची आयोजना र उक्त कम्पनीबीच बुधबार बिहान ठेक्का सम्झौता हुँदै छ ।
७ अर्ब ७१ करोड रुपैयाँमा मेलम्ची खोलामा इन्टेक (बाँध) बाँधी खन्न बाँकी २१ किलोमिटर सुरुङ निर्माण गरी सुन्दरीजलसम्म पानी ल्याउने ठेक्का पाएको इटालियन कम्पनी सीएमसीले पनि स्टान्डर्ड चार्टर्ड बैंक या आफ्नो मुलुकको बैंकसित बैंकिङ सम्बन्ध भएको नेपाली बैंकमा ७७ करोड रुपैयाँ परफरमेन्स बन्ड राख्ने भएको छ । आयोजनाले दुवै ठेकेदार कम्पनीसित एकैदिन ठेक्का सम्झौता राख्ने तयारी गरे पनि परफरमेन्स बन्ड राख्ने विश्वासिलो र आयोजनाले समेत पत्याउने बैंक खोज्न समय लागेकाले सुरुङ निर्माण ठेक्का बुधबार हुन नसक्ने भएको छ ।
प्रकाशित मिति: २०७० असार २६
Popular VIDEO http://www.youtube.com/watch?v=xmpNPgUvoxY
No comments:
Post a Comment