नेपालमा 'माइक्रो मेनेजमेन्ट’ भारतका लागि घातक : दाहाल

See more at: http://media36.blogspot.com/
-भिडियो हेर्नुस्:http://www.youtube.com/watch?v=xmpNPgUvoxY
:http://www.youtube.com/watch?v=SsBsuj2TEog

 100,000 + Likes
 Buddha was born in NEPAL : हामी सँग प्रमाण छ ।
 मेरोनेपाल Mero Nepal
 Nepali music VDO

काठमाडौ, आश्विन ७ - एमाओवादी अध्यक्ष पुष्पकमल दाहालले भारतले नेपालमा सूक्ष्म व्यवस्थापन (माइक्रो मेनेजमेन्ट) गरे उसका लागि घातक हुने बताएका छन् । उनले सरकार, मन्त्री, सचिव कसलाई बनाउने विषयमा चासो नराख्न छिमेकी मुलुकलाई सुझावसमेत दिएका छन् ।
'अहिले पनि भारतले नेपालको माइक्रो मेनेजमेन्ट गर्छु भन्छ भने त्यो उसका लागि घातक हुन्छ भन्ने हाम्रो स्पष्ट मान्यता हो,' कान्तिपुरका प्रधानसम्पादक सुधीर शर्माद्वारा लिखित 'प्रयोगशाला ः नेपाली संक्रमणमा दिल्ली, दरबार र माओवादी' पुस्तक सार्वजनिकीकरण कार्यक्रममा उनले भने, 'नेपालमा सरकार, सचिव, मन्त्री को भनेर हात हाल्ने प्रवृत्ति छ, त्यो कायम रह्यो भने भारतका लागि घातक हुन्छ, त्यसले दुई देशको सम्बन्ध विस्तारमा मद्दत गर्दैन ।'
सशस्त्र युद्ध, शान्ति प्रक्रियादेखि हालसम्म भारतसँगको सम्बन्ध घोषित नीतिअनुसार भएको उल्लेख गर्दै उनले त्यहाँका राजनीतिक नेतृत्वसँग खुला कुरा गर्न चाहेको बताए । 'हामी भारतीय नेतृत्वसँग कुरा गर्न चाहन्छौं । उनीहरूको चासो के हो, उनीहरूको आर्थिक, सुरक्षा चासोमा हामी कुरा गर्न चाहन्छौं । हामी हाम्रो चासोको विषयमा पनि सीधा-सीधा कुरा गर्न चाहन्छौं,' उनले भने ।
पुस्तकमा माओवादीले भारतीय खुफिया एजेन्सी -रअ) भेटेको भनी खुलाइएको प्रसंगमा उनले त्यसअघि त्यहाँका राजनीतिज्ञसँग कुराकानी गरेको दाबी गरे । 'पहिले हामीले भारतका राजनीतिक नेतासँग कुरा गरेको हो । रअसँग मात्र कुरा गरे भन्ने कुरामा
दम छैन । नाम पनि भन्न तयार छु तर अहिले आवश्यक छैन । त्यहाँका बुद्धिजीवीसँग पनि कुरा भएको हो । त्यसपछि स्वाभाविक रूपमा रअसँग पनि कुरा भएको हो,' उनले भने, 'त्यो हाम्रो नीतिअनुसार गरेको हो । निरंकुशतन्त्रसँग लड्न कोसँग मिल्न सकिन्छ भनेर गरेकै हो ।'
भारत र तत्कालीन राजदरबारसँगको सम्बन्ध पार्टीको घोषित नीतिअनुसार भएको उल्लेख गर्दै उनले भारतका तत्कालीन प्रधानमन्त्री अटलबिहारी बाजपेयीलाई अन्य देशका सरकार प्रमुखसँगै सम्बन्ध विस्तारका लागि पत्र लेखेको दाबी गरे । 'प्रा. एसडी मुनीसँग हिजो विद्रोह गर्नुअघि पनि कुराकानी हुन्थ्यो । विद्रोहका बेला पनि कुराकानी भएकै हो । तर जुन दिन अटलबिहारी बाजपेयीलाई चिठी लेखियो, त्यही दिन त्यही बेहोराको चिठी चीनका राष्ट्रपतिलाई पनि लेखिएको थियो । राष्ट्रसंघलाई पनि लेखेका थियौं । अमेरिकाका राष्ट्रपति र युरोपेली युनियनलाई पनि लेखिएको थियो,' उनले भने, 'यहाँ मुनी र भारतलाई लेखेको चिठीको बडो चर्चा आउने गर्छ । यहाँ चर्चा यो परिवर्तन रअले ल्याइदिएको जस्तो भनेर गरिन्छ ।'
उनले नेपालको राजनीतिक परिवर्तन नेपालीले नै गरेको दाबी प्रस्तुत गरे । 'जनआन्दोलन-२ का बेला भारतको राजनीतिक टु पिलर थ्योरी थियो । त्यो भनेको राजतन्त्र र लोकतन्त्र हो । त्यो नेपाली जनताले नमानेपछि भारतको इच्छा लागू भयो त ? नेपाली जनता अघि बढेपछि परिवर्तन भएको होइन ? यो परिवर्तन नेपाली जनताले ल्याएको होइन, रअले ल्याएको हो भन्ने फोबिया हामीले किन राख्ने ?'
पुस्तकले उठाएका विषयवस्तुमाथि चर्चा गर्दै उनले माओवादीको शक्ति बढ्दै गएपछि सबै पक्षसँग सम्बन्ध विस्तार गर्नुपर्ने बाध्यताअनुसार भारतसँग 'डिल' गर्नुपरेको जनाए । 'हाम्रो शक्ति सञ्चय हुँदै गएपछि राजा र दरबारसँग, संसद्वादी, भारत, चीन, अमेरिका, युरोपेली युनियन सबैसँग कूटनीतिक डिल गर्नुपर्ने बाध्यता आएपछि गरिएको हो,' उनले भने, 'यो परिवर्तन भारत, चीन, अमेरिका, यरोपेली युनियन कसैले ल्याएको नभई नेपालीले ल्याएको हो । दसौं हजारको बलिदानबाट ल्याएको परिवर्तनलाई अरूले गरेर ल्याएको हो भनेर विश्लेषण गर्‍यौं भने त्यो हीनताबोधमा आधारित हुनेछ ।'
उनले निरंकुश राजतन्त्रविरुद्ध लड्न छिमेकीको सहयोग आवश्यक पर्ने भएर सम्बन्ध विस्तार गरेको जनाए । 'हामीले निरंकुशताविरुद्ध सम्बन्ध विस्तार गर्‍यौं । हामीलाई छिमेकीको सहयोग चाहिन्थ्यो,' उनले भने, 'नेपालमा एउटा युगको अन्त्य गरी नयाँ युगको सुरुआत गर्ने अवस्थामा हामीले चीन र भारतसँग कुरा गर्नुपथ्र्यो । गर्‍यौं ।'
उनले अन्धराष्ट्रवाद र आत्मसमर्पणवादी नीतिबाट मुलुकको हित नहुने भन्दै आफ्नो पार्टी समानताका आधारमा व्यवहार गर्ने प्रगतिशील राष्ट्रवादका पक्षमा भएको जनाए । कार्यक्रममा कांग्रेस नेता प्रदीप गिरीले भारतसँग लोकतन्त्र र चीनसँग कम्युनिस्टको आस गर्ने दिन सकिएको उल्लेख गर्दै नेपालमा भारत, चीन, अमेरिकाले आ-आफ्नो स्वार्थ चाहेको उल्लेख गरे ।
'सबैले आ-आफ्ना स्वार्थ चाहेका छन्, यहाँ सीआईए पनि छ, चीन पनि छ, आईएसआई पनि छ, बरु देखिने गरी आउनु रअको गल्ती हो,' उनको भनाइ थियो', 'यो पुस्तकले नेपालका राजनीतिज्ञप्रति प्रश्न तेस्र्याएको छ । प्रमुख राजनीतिज्ञहरू मिलेर भारतलाई तह लगाउन किन सक्दैनन् ? रअ आयो आयो भनेर किन कराउने ?'
'बहसको थालनी'
दाहालले 'प्रयोगशाला' ले नेपाल र बाह्य सम्बन्धबारे नयाँ बहस थालनी गरेको उल्लेख गरे । उनले पुस्तकमा माओवादीलाई नायक र खलनायक दुवै रूपमा चित्रण गरेको जनाए ।
'कोही ठाउँमा हेर्दा नायकजस्तो, कोही ठाउँमा खलनायकजस्तो देखाएको छ । नायकभित्र पनि खलनायक मिसिएजस्तो खलनायक बनाउन खोज्दा पनि नायक मिसिएजस्तो पाएँ,' उनले भने, 'कुल मिलाएर ठिकै-ठिकै छ भन्ने लाग्यो । घटना विवरण, तथ्य इमानदारीका साथ राख्ने जमर्को गर्नुभएको छ । उहाँले बहसको सुरुआत गर्ने जमर्को गर्नुभएको छ । त्यो सराहनीय छ ।'
प्राध्यापक धु्रवकुमारले भारतको प्रभाव पाइला-पाइलामा परेको पुस्तकले उजागार गरेको उल्लेख गरे । 'विदेशी जासुसी संस्थाले नेपालमा कसरी जाल फिँजाएको छ भन्ने पुस्तकले स्पष्ट गरेको छ,' उनले भने, 'दिल्ली, दरबार र माओवादी सम्बन्धले नेपालमा प्रजातन्त्र मासियो ।' उनले नेपालका राजनीतिक नेताले सार्वभौमसत्तामाथि सम्झौता गरेको आरोप लगाए ।
कांग्रेस नेता प्रदीप गिरिले माओवादी अध्यक्ष दाहालमा परिवर्तन आएको आफूले पाएको बताए । 'म उहाँको बचाउ गर्न चाहन्छु, उहाँमा परिपक्वता आएको छ, सुरुङ युद्धबाट उहाँ सिंगापुर, हङकङमा भेटघाट गर्न जान थाल्नुभयो ।' उनले कांग्रेसले भारत प्रजातान्त्रिक देश भएकाले हामीलाई नै सहयोग गर्छ ठान्नु र माओवादीले पनि आफू कम्युनिस्ट भएकाले चीनले मद्दत गर्छ भन्ने सोच्नु गलत भएको विश्लेषण गरे ।
कांग्रेसका युवानेता गगन थापाले पुस्तकले थुप्रै प्रश्न जन्माएको बताए । 'यदि एउटा अठार वर्षेले क्रान्तिकारी पार्टीको चुनाव घोषणापत्र र यो किताब पढेर भोट हाल्न गयो भने भोट खसाल्ने बेलामा उसको दिमागमा यो पुस्तक आउला कि घोषणापत्र ?,' उनले भने ।
'यो किताबले भनेजस्तो भारतीय खुफिया एजेन्सी नेपालको राजनीतिमा निणर्ायक हो कि होइन, आदरणीय नेताहरू यहाँ हुनुहुन्छ, यसबारे उहाँहरूले केही बताउनैपर्छ,' उनले जोडे ।
लेखक शर्माले पत्रकारिताका सिलसिलामा पाएका तथ्यहरूको विस्तृत रूप 'प्रयोगशाला' भएको बताए । पुस्तक लेख्नुको उद्देश्य नै बहस भएको उल्लेख गर्दै सुरुमै बहस भएकामा उनले खुसी व्यक्त गरे । 'सत्यतथ्य प्रस्तुत गर्दा कोही नायकजस्ता देखिए होला, कोही खलनायकजस्ता,' उनले भने, 'यो आ-आफ्नो बुझाइमा भर पर्छ ।'
'नेपालमा भारतले माइक्रो मेनेजमेन्ट नगराओस् भन्ने उद्देश्य हो,' उनले थपे ।
फाइन पि्रन्टले प्रकाशन गरेको पुस्तकमा विशेषगरी माओवादी, दरबार र दिल्लीको सम्बन्धलाई मसिनो गरी केलाइएको छ । संक्रमणकालमा बाह्य चलखेलको प्रभावले मुलुक कसरी चपेटामा परेको थियो भन्ने पुस्तकमा उल्लेख छ । पुस्तकले संक्रमणकालमा आन्तरिक र बाह्य चलखेलको पर्दा उघारेको छ । पुस्तकको विमोचन लेखककी आमा शान्ता शर्माले गरिन् ।
कार्यक्रममा राजनीतिक दलका नेताहरू, प्रधानसेनापति गौरवशमशेर राणा, बलाध्यक्ष रथी पवन पाण्डे, विभिन्न क्षेत्रका बुद्धिजीवी, उच्च कर्मचारीहरूलगायतको उल्लेखनीय उपस्थिति थियो ।

प्रकाशित मिति: २०७० आश्विन ७