-भिडियो हेर्नुस्:http://www.youtube.com/
रोग नियन्त्रण नहुँदै कुखुरा खुला गर्ने तयारी
भक्तपुर,
श्रावण २४ -
बर्डफ्लु नियन्त्रण नहुँदै व्यवसायीको दबाबमा सरकारले कुखुरा ओसारपसार
गर्न दिने तयारी गरेको बेला भक्तपुरमा थप ८ वटा फर्मको कुखुरामा बर्डफ्लु
भेटिएको छ। रोग नियन्त्रण नहुँदै ओसारपसार खुला गरिएकामा उपभोक्ताहरू
चिन्तित भएका छन् । खुला गरिएकामा राष्ट्रिय मानव अधिकार आयोगले समेत
आपत्ति जनाएको छ । एक साताअघिको निर्णय फुकुवा गर्न कुखुरा व्यवसायी, राजनीतिक दलका नेता र मन्त्रीहरूसमेत लागिपरेका थिए । पशु स्वास्थ्य निर्देशनालयका प्रवक्ता डा. नारायण घिमिरेले भने, 'एक साताअघि लगाएको प्रतिबन्ध बिहीबारदेखि फुकुवा हुँदैछ । अब स्वस्थ कुखुरा बजारमा लैजान पाइन्छ ।' परीक्षण गरी स्वस्थ पाइएका कुखुरा मात्र बजारमा लैजान पाइने निर्णय भएको पनि उनले जनाए । तीन साताअघि मुलुकका विभिन्न ठाउँमा बर्डफ्लु देखिएपछि सरकारले गत बिहीबारदेखि ओसारपसार गर्न प्रतिबन्ध लगाएको थियो ।
आयोगले पछिल्लो निर्णयप्रति ध्यानाकर्षण भएको जनाउँदै प्रयोगशालाबाट बर्डफ्लु निर्मूल भएको पुष्टि नगरी ओसारपसारमा खुला गर्न नहुने जनाएको छ । आयोगले उपभोक्ता मानव अधिकार अनुगमन निर्देशिका उल्लंघन गरी निर्णय गरे हस्तक्षेप गर्न सक्छ ।
आयोगका प्रवक्ता गौरी प्रधानले भने, 'बर्डफ्लु जनस्वास्थ्यमा असर गर्ने संवेदनशील कुरा हो । सरकारले निर्णय परिवर्तन गर्दा प्रयोगशालाको अनुसन्धानबाट पुष्टि हुने आधार चाहिन्छ । दबाबका आधारमा निर्णय गर्ने हो भने मानव स्वास्थ्यमा असर गर्न सक्छ ।'
व्यवसायीले रोगी कुखुरासमेत रातारात बिक्री गर्न थालेपछि सरकारले गत बिहीबारदेखि ओसारपसारमा रोक लगाएको थियो । रोक लगाउनुअघि नै व्यवसायीले भक्तपुरका हजारौं रोगी कुखुरा काठमाडौं, ललितपुर, काभ्रे, वीरगन्जलगायत स्थानमा पुर्याएका थिए ।
कुखुराहरू खोरमै मर्न थालेपछि भने व्यवसायीले क्षतिपूर्ति दाबी गर्न रोगी कुखुरा परीक्षणका लागि पठाउन सुरु गरेका थिए । परीक्षणका क्रममा अचेल दैनिक ५ भन्दा बढी र्फममा बर्डफ्लु पुष्टि हुने गरेको छ । बुधबारसम्म भक्तपुरका मात्रै २४ भन्दा बढी र्फममा बर्डफ्लु देखिएको थियो ।
साउनमा मात्रै मुलुकभर ४४ र्फममा बर्डफ्लु पुष्टि भएको छ । ती र्फमका १ लाख ७० हजार कुखुरा नष्ट गरिएको छ ।
सरकारले थप एक साता रोक लगाउने तयारी गरेको भए पनि व्यवसायीको दबाबमा बिहीबारदेखि खुला गर्ने निर्णय भएको कृषि मन्त्रालयका एक अधिकारीले बताए । व्यवसायीले प्रतिबन्ध फुकुवा नगरे आन्दोलन गर्ने चेतावनी दिएको पनि उनले जनाए ।
उपभोक्ता हित संरक्षण मञ्चका महासचिव ज्योति बानियाँले व्यवसायीको दबाबमा ओसारपसारमा फुकुवा लगाउने निर्णय भएको बताए । 'सरकार नागरिककोभन्दा पनि व्यवसायीको पक्षमा रह्यो,' उनले भने, 'जनताको जीउज्यानमा ख्याल गरेन ।' उपभोक्ताको स्वास्थ्यमा खेलवाड गर्ने निर्णय भएकाले मानव अधिकार आयोग र सरकारको केन्द्रीय अनुगमन समितिले तत्काल हस्तक्षेप गर्नुपर्ने उनले बताए ।
प्रवक्ता घिमिरेले भने स्वस्थ कुखुरा मात्र ओसारपसार गर्न पाइने र उपत्यका बाहिर लाने/ल्याउने गर्दा नागढुंगा, फर्पिङ, साँगा र नागार्जुन नाका मात्र प्रयोग गर्नुपर्ने जनाए । ती चारै नाकामा प्राविधिक खटाइने र अन्य नाकाबाट ओसारपसार गर्न नपाइने उनले बताए ।
नेपाल पोल्ट्री महासंघका प्रथम उपाध्यक्ष नारायणहरि खत्रीले भने प्रतिबन्ध हटाउन व्यवसायीले दबाब नदिएको दाबी गरे । परीक्षण गरेर स्वस्थ मानिएको कुखुरा मात्रै बजारमा पठाइने पनि उनले बताए । सरकारले यसअघि क्वारेन्टाइन (चेकजाँच) को व्यवस्था गर्दा पनि रोगी कुखुरा बजारमा पुगेको थियो ।
प्रकाशित मिति: २०७० श्रावण २४
No comments:
Post a Comment