काठमाडौं, असार १० - छ वर्षपछि काठमाडौं महानगरपालिका न्युनतम सर्त र कार्यसम्पादन मुल्याङकन (एमसीपीएम) मा सफल भएको छ । आर्थिक वर्ष ०६८/६९ मा महानगरले न्युनतम सर्त र कार्य सम्पादन मापनमा सफल भएको हो । न्युनतम सर्त र कार्यसम्पादन मापनमा छ पटकसम्म असफल भएको महानगर यस वर्ष सफल भएको हो ।
स्थानीय विकास मन्त्रालयका प्रवक्ता दिनेश थपलियाले यस वर्ष कार्यसम्पादन मुल्यांकनमा सफल भएको बताए । 'यसपाली बल्ल पास भयो, कर्मचारीको चरम लापरबाहीले गर्दा कार्यसम्पादन मूल्यांकनमा असफल भएको थियो,' उनले भने, 'तेह्र वटै सुचाकांकमा महानगर सफल भएको छ । केही दिनमा सबै परिणाम बाहिर आउँछ ।'
यस अघि महानगरले करदाताको विवरण अद्यावधिक राख्ने र मासिक प्रतिवेदन स्थानीय विकास मन्त्रालय बुझाउने काम कहिल्यै नगरेको उनले बताए । कार्यसम्पादन मुल्यांकनमा असफल हुंदा प्रत्येक वर्ष मन्त्रालयले दिंदै आएको अनुदान रकमसमेत महानगरले गुमाउंदै आएको थियो । गत वर्ष महानगर ५८ नगरपालिकामध्ये ५७ औ स्थानमा झरेको थियो । महानगरले सर्लाहीको मलंगवा नगरपलिकालाई मात्र जितेको थियो ।
कार्यसम्पादन मुल्यांकनमा सफलतापछि लामो समयदेखि गुमाउदै आएको मन्त्रालयको अनुदान रकम महानगरले पाउने छ । गत वर्ष महानगरले न्यूनतम् सर्त तथा कार्यसम्पादन मूल्यांकनमा चालीस अंक प्राप्त गरेको थियो । यसपालिको कार्यसम्पादन मुल्याङकनको प्राप्तांक भने हालसम्म मन्त्रालय खुलाएको छैन् ।
लेखापरीक्षणको विवरण, बेरुजु र फछ्र्यौटको अभिलेख कारबाही सबैमा सफल देखिएको छ । महानगर प्रशासन महाशाखाका प्रमुख महेश काफ्लेले गतवर्ष राजस्व संकलन, स्थानीय शासन, सेवा प्रवाह, पारदर्शीताजस्ता आधारभूत र अनिवार्य कामलाई प्राथमिकता राखेर काम गरेकाले महानगर सफल भएको दाबी गरे ।
कार्यसम्पादन तथा मूल्यांकनमा असफल हुनबाट बचाउन वित्तीय अनुशासन कायम गर्नुपर्ने उनको भनाइ थियो । 'राजस्व जस्ता कुराको स्पष्ट तथ्यांक राखेका छौं, अन्य वर्षभन्दा सुधार आएको छ,' उनले भने । कर्मचारी र करदाताको सहयोगले पनि कार्य सम्पादन मूल्यांकनमा महानगर सफल भएको उनको भनाइ थियो ।
यसअघिको कार्यसम्पादन मूल्यांकनमा योजना तथा बजेट स्वीकृति, प्रगति समीक्षा, कर तथा आयस्रोतत अभिलेख, लेखापरीक्षणलगायत जिन्सी व्यवस्थापनमा महानगर असफल भएको थियो । नगरपालिकाले न्यूनतम् सर्त पालना नगर्दा त्यसको दण्डस्वरूप ३३ करोड १३ लाख रुपैयाँ कटौती गरेको मन्त्रालयले कटौतीसमेत गरेको थियो ।
प्रकाशित मिति: २०७० असार १०
- See more at: https://www.facebook.com/nepalinewsshttp://www.youtube.com/watch?v=xmpNPgUvoxY
No comments:
Post a Comment