काठमाडौ, असार १० - पाकिस्तानको नङ्गा पर्वत आरोहणमा गएका एक नेपालीसहित ११ विदेशी आरोहीको आइतबार अज्ञात बन्दुकधारीको आक्रमणबाट मृत्यु भएको छ । हत्या गरिएका नेपाली ३५ वर्षका सोना शेर्पा हुन् ।
उनीहरू विश्वका ८ हजार मिटर अग्ला १४ हिमालमध्ये एक नङ्गा पर्वत चढ्न गएका थिए । यही टोलीलाई लिएर आरोहीहरू छाङदावा शेर्पा र टासी शेर्पा पाकिस्तान गएका थिए । उनीहरू आरोहीको एउटा समूहलाई नङ्गा पर्वत पठाएर अरू समूहलाई जी-१ र जी-२ हिमाल आरोहणमा पठाउने तयारी गर्दै थिए । नङ्गा पर्वत गएको टोलीमा रहेका आठ नेपाली शेर्पा राति बाटो बनाउन गएकाले आक्रमणबाट जोगिएका थिए । उनीहरू सबै सकुशल रहेको टासीले कान्तिपुरसँगको अनलाइन कुराकानीमा बताए । नङ्गा विश्वको नवौं अग्लो हिमाल हो । पाल टाँगेर सुतिरहेका बेला मध्यरातमा बन्दुकधारीले ती आरोहीलाई आक्रमण गरेको नेपालबाट आरोहीलाई पठाउने काठमाडौंस्थित सेभेन समिट ट्रेकिङ एजेन्सीका मिग्मा शेर्पाले बताए ।
हत्या गरिएका अन्यमा पाँच युक्रेनी, तीन चिनियाँ र एक लाटभियाली छन् । आक्रमणमा एक पाकिस्तानी सेफ पनि मारिएको जनाइएको छ । सुतिरहेका बेला एक्कासि गोली चलेपछि आरोहीबीच भागदौड मच्चिएको थियो । टासीले बिहानै इमेल गरेर अरू आरोहीको उद्धारका लागि आग्रह गरिदिन कान्तिपुरसँग आग्रह गरेका थिए । बीबीसीका अनुसार उक्त आक्रमणको जिम्मा पाकिस्तानी आतंकवादी संगठन जुन्दुल्लाहले लिएको छ ।
सेभेन समिटका सञ्चालक दाजुभाइ मिग्मा र छाङदावा शेर्पा हुन् । दुवै दाजुभाइले विश्वका ८ हजार मिटरभन्दा अग्ला १४ वटै हिमाल आराहण गरेर कीर्तिमान कायम गरेका छन् । चिनियाँ तीन आरोही र आरोहणमा सघाउन नेपाली आठ जना शेर्पासहित आरोही छाङदावा गत साता पाकिस्तान गएका थिए । पाकिस्तानी सेनाले हेलिकप्टरमार्फत अरू आरोहीको उद्धार गरेको इस्लामावादमा रहेका टासीले कान्तिपुरलाई बताए । 'हामीले सोनाको शव प्राप्त गरेका छौं,' उनले भने, 'अरू नेपालीलाई समेत सेनाले उद्धार गरेर गुलगिटस्थित सैनिक क्याम्पमा राखेको छ ।' सेभेन समिटका सञ्चालक मिग्माले आक्रमणका बेला बाटो बनाउन गएका कर्मा शेर्पासँग आफ्नो सम्पर्क भएको बताए । 'टोलीमा रहेका पेछेम्पे शेर्पा, ओलुङ दोर्जे शेर्पा, दानुरु शेर्पा, मिग्मा छिन्दु शेर्पालगायत आठ नेपालीसहित आरोहीलाई उद्धार गरेर सेनाले आफ्नो क्याम्पमा राखेको छ,' उनले भने, 'उनीहरूलाई सोमबार इस्लामावाद ल्याइने जानकारी आएको छ ।'
आक्रमणमा मारिएका सोना सोलुखुम्बुको छेस्कामका स्थायी बासिन्दा हुन् । उनी काठमाडौंमै बसेर आरोहणमा जानेहरूलाई सघाउँदै आएका थिए । उनका पत्नी र दुई छोरा छन् । उनले यसअघि सगरमाथा आरोहण गरिसकेको मिग्माले जनाए । आरोहीहरू नेपाली एजेन्सीबाट पाकिस्तानका हिमाल आरोहण गर्न आरोही जाने गरेका थिए । विश्वका ८ हजार मिटरभन्दा अग्ला पाँच हिमाल पाकिस्तानमा पर्छ ।
प्रकाशित मिति: २०७० असार १०
No comments:
Post a Comment