पोखरा, असार १७ -
नेकपा-माओवादीको जारी केन्द्रीय समिति पूर्ण बैठकका सहभागीले घोषित संविधानसभा निर्वाचन बहिष्कार र बिथोलेर जनविद्रोहमा जानुपर्नेमा जोड दिएका छन् । बैठकमा अध्यक्ष मोहन बैद्यको राजनैतिक र महासचिव रामबहादुर थापाद्वारा प्रस्तुत संगठन र संघर्ष प्रस्तावमाथि छलफलमा सहभागीले जनविबद्रोहमै जोड दिएका हुन् । छलफलमा तीन पोलिटब्यूरो सदस्यहरु कुलबहादुर केसी, धर्मेन्द्र बाँस्तोला र खड्कबहादुर विश्वकर्मासहित ५२ केन्द्रीय सदस्य तथा सल्लाहकारले प्रस्तावमाथि धारणा राखेका थिए । 'अध्यक्ष र महासचिवको प्रस्तावमाथि केही परिमार्जनको सुझाव आएका छन', पार्टी प्रवक्ता पम्फा भुसालले भनिन्, 'समग्रमा सबैले दुवै प्रस्तावलाई समर्थन गर्दै जनविद्रोहमा जानुपर्नेमा एकमत जाहेर गर्नुभएको छ ।' देशको राष्ट्रिय स्वाधिनता संकटग्रस्त भएकाले त्यसको रक्षार्थ सबै देशभक्त एकजुट हुनुपर्नेमा वक्ताको जोड रहेको उनले बताइन् ।
संविधानसभा निर्वाचनलाई उपयोग गरेर जानुपर्छ भन्ने महासचिव थापाले नै जनविद्रोह गर्नुपर्छ भनेर नेतृत्व गरेपछि यो बलियो बन्दै गएको अनुमान गरिएको छ । 'सबै वक्ताले जनविद्रोहमै जान जोड दिनुभयो,' एक केन्द्रीय सदस्यले भने, 'निर्वाचन बहिष्कार गर्ने क्रममा सरकार दमनमा उत्रने र त्यही दमनमा टेकेर जनविद्रोहमा जान सजिलो हुने तर्क उठ्यो ।' शनिबार सुरु बैठकमा निर्वाचनै हुन नदिनेलगायत विषय समेट्दै वैद्यले राजनीतिक प्रस्ताव पेश गरेका थिए । सोही प्रस्तावका आधारमा महासचिव थापाले पनि निर्वाचन बिथोल्न युवा दस्ता गठनलगायत संघर्ष र कार्यक्रम समटेका छन् ।
संविधानसभा दोस्रो निर्वाचनको औचित्य र अर्थ नभएको भन्दै बहिष्कार गर्ने प्रस्तावमा एकमत भएको बताए पनि प्रवक्ताले भने निर्वाचनै नहुने बताइन् । हुनै नसक्ने निर्वाचनको बहिष्कार र बिथोल्ने भन्नुको कुनै अर्थ नहुने उनको भनाइ थियो । 'अहिलेकै अवस्थामा निर्वाचन हुँदैन', भुसालले भनिन्, 'हामीले बिथोल्नै पर्दैन ।' जनताको अधिकारका लागि लड्दै प्रतिक्रान्तिविरुद्ध अघि बढ्नुपर्ने बैठकमा कुरा आएको भन्दै भुसालले नेपालीले नै आफ्नो फैसला गर्नुपर्ने बताइन् ।
राजनीतिक दलको गोलमेच सभा, संयुक्त राष्ट्रिय सरकारबाट अग्रगमनका लागि अघि बढ्नुपर्नेमा पार्टी अडिग रहेको उनको भनाइ थियो ।
वक्ताले पार्टीलाई संगठनात्मक रुपमा बलियो बनाएर संघर्षमा जानुपर्ने विचार राखेका थिए । अध्यक्ष र महासचिवको दुवै प्रस्तावलाई बलियो बनाउन आइतबारको बैठकमा हार्ड लाइनर भनेर चिनिने पोलिटब्यूरो तथा केन्दि्रय सदस्यलाई बोल्न दिएको स्रोतले बतायो । वक्ताले संघर्षका कडा कार्यक्रमसहित आन्दोलनमा जानुपर्नेमा जोड दिए ।
मोबाइल प्रतिबन्ध
बैठकमा सहभागी कसैलाई पनि मोबाइल, क्यामेरा लैजान दिएको छैन । साथै त्यहाँ प्रस्तुत दुवै प्रस्ताव सार्वजनिक हुने भन्दै कार्यक्रमस्थलमै पढ्न दिएर फिर्ता लिने गरिएको छ । 'सहभागीका मोवाइलको ब्याट्रीसमेत झिेकर राखिन्छ,' एक सहभागीले भने, 'चिनेजानेकाको मोबाइल स्विच अफ गरी गेटमा बस्ने स्वयंसेवकले राखिदिन्छन् ।' प्रस्ताव तथा त्यसमाथि हुने छलफल मोबाइलको माध्ययमबाट बाहिरिन सक्ने भन्दै कडा निगरानी गरिएको उनले बताए । प्रवक्ताबाहेक कसैले नबोल्न कडा निर्देशन दिएको छ । बैठकस्थल छाडेर प्रांगणमा बस्ने, चुरोट तान्ने, शौचालयमा ढिलाइ गर्नसमेत पाइँदैन ।
प्रकाशित मिति: २०७० असार १७
- See more at: https://www.facebook.com/nepalinewsshttp://www.youtube.com/watch?v=xmpNPgUvoxY
No comments:
Post a Comment