यो साता को साप्ताहिक मा के के प्रकासित भये ? सबै कुरा एउटै पेज मा सरल तरिकले हेर्नुस् ....

फ्रन्टपेज

 »

गाईजात्रा फिभर

विदुर खतिवडा

हिजो गाईजात्रा, काठमाडौंलगायत मुलुकका विभिन्न स्थानमा गाईजात्रा र्‍यालीहरू निकालिए। सधैंझैं गाईजात्रामा थुप्रै किसिमका दृश्य देखिए यसपटक पनि। मल्लकालमा जगतप्रकाश मल्लले पुत्र वियोगमा मन बहलाउन प्रारम्भ गरेको यो पर्व अहिले आएर विभिन्न कारणले महत्त्वपूर्ण बन्दै गएको छ। खेतीकिसानीको समय सकिएपछि मनाइने पर्व गाईजात्रामा हास्यकलाकारहरूले खुलेर समसामयिक परिस्थितिप्रति व्यंग्य कस्छन्। यो पर्वमा विभिन्न गेटअप र चरित्रमा पनि प्रस्तुत हुन पाइने छुट पनि छ। बुधबारदेखि नै नेपाल प्रज्ञा-प्रतिष्ठान तथा राष्ट्रिय सभागृहमा मुलुककै ख्यातिप्राप्त हास्यकलाकारहरूले दर्शकहरूलाई हँसाइरहेकै छन्।

गाईजात्राकै अवसर पारेर नेवारी समाजले गत वर्ष मृत्युवरण गरेकाहरूको आत्माको चिरशान्तिको कामना गर्दै आएको छ। यही मेसोमा समलिंगी, तेस्रोलिंगी, द्विलिंगी तथा अन्तर्लिंगीहरूको समूहले पनि विभिन्न भाव-भंगिमामा र्‍याली आयोजित गर्छ। ब्लु डायमन्ड सोसाइटी अर्थात् नीलहीरा समाजले सन् २००१ मा प्रारम्भ गरेको गाईजात्रे र्‍याली यसपटक पनि भव्य रूपमा सम्पन्न भयो।

यसपटकको र्‍यालीमा भूमिका श्रेष्ठ नेतृत्व तहमा रहेर त्यसको व्यवस्थापनमा व्यस्त देखिन्थिन्। ब्लु डायमन्ड सोसाइटीकी बोर्ड मेम्बर भूमिका गत वर्ष भने धिमाल डे्रसमा सजिएर र्‍यालीमा सहभागी भएकी थिइन्। भूमिकाका अनुसार उनले विगतमा ड्रागक्विन -फिदर सहित एक्स्ट्रा डे्रसअप र गेटअप जसमा मनोरन्जनका निम्ति प्रतिष्ठित व्यक्तित्वको दुरुस्त नक्कल गरिन्छ) का रूपमा पनि सहभागिता जनाएकी थिइन्।

गत वर्ष पर्यटन प्रवर्द्धनको नारा तय गरेको ब्लु डायमन्डले यसपटक भने 'म एक नागरिक मेरो एक भोट, हाम्रो प्रतिनिधित्वको खास महत्व छ' नारा तय गरेर र्‍यालीमा सहभागिता जनायो। जात्रामा ड्रागक्विन अर्थात् इन्टरनेसनल सेलिब्रेटीहरूको नक्कलमा थुप्रै देखिए। लेडी गागादेखि लिएर मर्लिन मुनरो, बियोन्से, जेनिफर हसन आदि सेलिब्रेटीझैं बनेर र्‍यालीमा सहभागी थिए तेस्रोलिंगीहरू। उनीहरू र्‍यालीमा कल्चरल, ड्रागक्विन, कमेडी, सेक्सी, सिम्पलजस्ता गेटअपमा देखा परे।

नेपाली समाजको परम्परागत मान्यता र साँघुरो सोचका कारण सार्वजनिक हुन नसकेका समलिंगी तथा तेस्रोलिंगीहरू घरबाट निस्किएर आफ्नो स्वतन्त्रता उपभोग गर्न पाउन् भनेर ब्लु डायमन्डले गाईजात्रामा सहभागिता जनाउन थालेको थियो। 'यो दिन पुराना मात्र होइन, थुप्रै नयाँ साथीहरू पनि देखा पर्नुहुन्छ,'  भूमिकाले भनिन्- 'गाईजात्रा स्वतन्त्रता उपभोग गर्न पाउने दिन भएकाले हामीले यो दिनलाई आफ्ना निम्ति उपयोग गरेका हौं।' भूमिकाका अनुसार आफ्नो लैंगिक पहिचान तथा यौनिकता लुकाएर बस्नुपर्ने बाध्यता भएकाहरू यो र्‍यालीमा समलिंगी एवं तेस्रोलिंगीहरूका विभिन्न भावभंगिमा देखेर समाजमा खुलेर आउने हौसला-प्रेरणा प्राप्त गर्न सक्छन्। समलिंगी-तेस्रोलिंगीहरूले गाईजात्रालाई आफ्नो पक्षमा उपयुक्त वातावरण सिर्जना गर्ने दिनका रूपमा प्रयोग गर्दै आएका छन्।

केटाले केटी बन्न पाउने, केटीले केटा बन्न पाउने यो अवसरमा कोही जोगी बनेका हुन्छन्, कोही राम, सीता, रावण त कोही कृष्ण-गोपिनी बनेर देखा पर्छन्। ब्लु डायमन्डले दिवंगत भएका आफ्ना समुदायका साथीहरूको आत्माको चिरशान्तिका लागि यो पर्व मनाउँदै आएको कुरा पनि बताएको छ। प्रारम्भिक वर्षहरूमा सानो जमातले मात्र उपस्थिति जनाउने यो जात्रामा पछिल्ला चार वर्ष यता विदेशी समलिंगी तथा तेस्रोलिंगीहरू पनि सहभागी हुन थालेका  छन्। 

फ्रन्टपेज

»

उषा पौडेल हिन्दी चलचित्रमा

सुव्रत आचार्य

साढे तीन वर्षदेखि मुम्बईमा संघर्षरत नायिका उषा पौडेल अब बलिउडको चलचित्रमा देखिने भएकी छिन्। ओस्कार विजेता चलचित्र 'स्लमडग मिलेनियर'मा देखिएका एक अभिनेता अंकुर विकलको जोडीको भूमिकामा उनले भर्खरै छायांकन सकेको चलचित्रको शीर्षक हो- 'सुन लड्की'। चलचित्रमा नायक तथा नायिका नयाँ छन्। उषा पौडेल उक्त चलचित्रकी मुख्य सहअभिनेत्री हुन्। 'मेरो वास्तविक नाम रुक्मणी हो, त्यसैले उता पासपोर्टमा भएको नामबाटै चिनिएकी छु। कसैले रुक्मणी भन्छन्, कसैले रुकु त कसैले रुक्मा।' -उषाले नाम बदल्नु परेको प्रसंग सुनाइन्।

विगत डेढ महिनादेखि काठमाडौंमा छुट्टी मनाइरहेकी रुक्मणी अर्थात् उषाले आज शुक्रबार मुम्बई र्फकनुअघि मंगलबार साप्ताहिकसँग केही अनौपचारिक कुराकानी गरिन्। 'मुम्बईमा साढे तीन वर्ष संघर्ष गरेर अहिले स्थापित हुने क्रममा छु। अहिले दुई महिनाजति कामबाट फुर्सद भएकाले आफ्नो घर फर्किएकी हुँ। यसपटकको मेरो बसाइ नितान्त पारिवारिक र व्यक्तिगत भएकाले मैले फेसबुकमा नेपाल आइसकेको स्ट्याटस मात्र लेखेकी थिएँ। त्यही स्ट्याटस्का कारण केही साथीभाइले कन्ट्याक्ट गर्नुभयो। मैले पनि केही नजिकका साथीहरूलाई भेटेँ। भेटघाटमै बित्यो डेढ महिना।'

महाकवि लक्ष्मीप्रसाद देवकोटाको कृति 'मुनामदन'माथि बनेको चलचित्रमा मुना भएर चर्चामा आएकी उषाले यहाँ चालीसवटा चलचित्रमा नायिका भएर काम गरिन्। यता स्थापित भैसकेकी उषा अनायसै मुम्बई पलायन भइन्। 'मुम्बई पलायन हुने सोच थिएन। हरेक कलाकारको सपनाको मुम्बई फिल्म नगरी, म त्यो नगरीमा भाग्य परीक्षा गर्न गएकी थिएँ।' अहिले उषा यो भाग्य परीक्षामा धेरै हदसम्म अघि बढिसकेको अवस्था छ।

'हरेक दिन फुटबलजस्तो अडिसन दिँदै यता-उता दौडिरहन्थे।' -मुम्बईमा कुनै चिना-परिचयबिना हुत्तिएर पुगेकी उषाले भनिन्- 'स्ट्रगल गरिरहेका तीन जना केटी साथी भेटेँ। उनीहरूसँग सानो रुम लिएर बस्न थालेँ। पेपर एड, टेलि एड आदिमा काम गरेर खाने-बस्ने खर्च जुटाइरहेँ, तर कास्टिङ काउचको बाटो समातिनँ। यदि त्यो बाटो समातेको भए मलाई आफ्नो उद्देश्यमा पुग्न तीन वर्षको लामो समय लाग्दैनथ्यो।' उनले ऋत्विक रोशन अभिनीत 'अग्निपथ'मा ऋत्विककी बहिनीको भूमिकाका लागि अडिसन दिन गएको तर भाषाका कारण छनौट नभएको कुरा सुनाउँदै भनिन्- 'भाषामा समस्या भएपछि म अनुपम खेरको अभिनय स्कुलमा भर्ना भएँ। त्यहाँ अभिनयका साथै हिन्दी भाषा उच्चारणको प्रशिक्षण लिएँ, तर त्यतिले पुगेन। अनि हिन्दी भाषा प्रशिक्षणको विशेष कक्षा लिएँ, जसले मलाई फाइदा पुर्‍यायो।'

अक्षय कुमारले सञ्चालन गरेको रियालिटी शो 'मास्टर सेफ'को प्रोमोसनल उनको करियर अघि बढाउने ढोका बन्यो। त्यसपछि उनले चलचित्र, टेलिसिरियल, विज्ञापन आदिमा काम लगाइदिने एजेन्टहरू भेटिन्। सुरुवातमा उनले धार्मिक टेलिसिरियलहरूमा मुख्य भूमिका पाउँदै गइन्। 'जय जय जय बजरंगबली', 'जय शनीदेव', 'विष्णु पुराण' जस्ता धार्मिक तर महँगो बजेटका श्रृंखलामा उनको व्यस्तता बढ्दै गयो। उनले त्यसपछि 'अदालत', 'चिन्टु चिंकी और एक बढी सी लभस्टोरी'मा पनि मुख्य चरित्र निर्वाह गर्ने अवसर पाइन्। नेपाल आउनुअघि हरर श्रृंखला 'फेयर फाइल्स'मा अभिनय गरिन्। 'तुझसंग पि्रत लगाई सजना'मा उनको कामको निकै प्रशंसा भयो।

'मैले नेपाली चलचित्रलाई चटक्क माया मारेकी छैन, तर तत्काल फर्केर यता आउने मेरो कुनै योजना छैन। बीचमा मलाई अशोक शर्माले एउटा चलचित्रका लागि अफर गर्नुभएको थियो। म त्यतिबेला 'तुझसँग पि्रत लगाई सजना'को टाइट सेड्युलमा थिएँ। कुनै बेला मुम्बईमा पनि फुर्सद हुन्छ, त्यतिबेला यताको काम पाइयो भने गर्न पनि सकिन्छ,' -उषाले नेपाली चलचित्रप्रतिको लगावलाई व्यक्त गरिन्। समकालीन रेखा थापा, ऋचा घिमिरे, झरना थापा, अरुणिमा लम्साल, सञ्चिता लुइँटेलहरूले विवाह गरिसकेको र कतिपयले फिल्म लाइन नै छोडिसकेको अवस्थामा उषा भने अहिलेसम्म अविवाहित नै छिन्। विवाह र प्रेमका बारेमा उषाले भनिन्- 'प्रेम गर्ने समय छैन, विवाह हुन्छ कि हुँदैन थाहा छैन।'

हिन्दी चलचित्र 'सुन लड्की'मा काम गरिसकेपछि त्यसबाट आउने रेस्पोन्सले उनको बलिउड करियर निर्धारण गर्नेछ। तैपनि उषा हिन्दी श्रृंखलाहरूमा भने लगभग स्थापित भैसकेकी छिन्। 'हेर्दै जानु कुनै दिन मैले गोल हान्नेछु,' छुट्टनिे बेलामा उषाले हाँस्दै भनिन्।

अन्तर-कुन्तर कुराकानी

गृहपृष्ठ » » अन्तर-कुन्तर कुराकानी » लेखहरु »

रिमा विश्वकर्मा -नायिका/मोडल)

विदुर खतिवडा

पहिलो पटक कहिले आफू राम्री छु भन्ने कहिले लाग्यो ?

कक्षा ६ मा हुँदा स्कुलको सांस्कृतिक कार्यक्रमका क्रममा मेकअप गरेर ऐना हेर्दा, ए म त राम्री रहेछु भन्ने लाग्यो।

तपाईंलाई आफ्नो कुन अंग सबैभन्दा आकर्षक छ जस्तो लाग्छ ?

ओठ, त्यसैले मेरो मुस्कानमा फिदा हुनेहरू धेरै छन्।

रिमाका बारेमा थाहा नपाइएको गोप्य कुरा ?

म अरूको डायरी र मोबाइल भेटें भने खोतलेर हेर्न थालिहाल्छु, नहेरिरहन सक्दिनँ।

एक वाक्यमा जीवन के हो ?

जीवन अनुभवको गाथा हो, त्यसमा हाँसो, रोदन, हारजित सबै कुरा अनुभव गर्नुपर्छ। जति बुझ्यो त्यति जटिल छ जीवन।

राम्रो पुरुष देख्दा पहिलो नजर कुन अंगमा जान्छ ?

अंगभन्दा पनि उसको स्माइलमा ध्यान दिन्छु। मलाई हँसिला एवं प्रभावशाली मानिस मन पर्छन्।

पहिलो पटक कहिले, कसलाई मन पराउनुभएको थियो ?

९ कक्षामा अध्ययनरत हुँदा एकाउन्ट टिचर मलाई असाध्यै मन पर्नुभएको थियो। म उहाँको कडा अनुशासनबाट प्रभावित थिएँ। एसएलसी सकेपछि मैले उहाँलाई मन पराएको कुरा सुनाएकी पनि थिएँ।

तपाईंलाई कस्तो मौसममा विपरीतलिंगीसँगको रोमान्समा हराउन मन लाग्छ ?

मलाई 'रेनी' सिजनको रोमान्स गजबको हुन्छ जस्तो लाग्छ, दुवै जना भिजेको रोमान्टिक सिन हेर्दा पनि राम्रो देखिन्छ नि।

कसलाई देख्दा सेक्स डिजायर बढेर आउँछ ?

एनरिके

चलचित्रमा बेडसिन दिनुपर्ने दृश्य राखिएको रहेछ भने ?

म सकेसम्म त्यस्तो सिन अस्वीकार गर्छु तर निर्देशकले सकारात्मक ढंगमा मलाई सहमत गराउन सक्नुहुन्छ वा सक्नुहुन्न भन्ने कुरामा पनि बेडसिन दिने-नदिने कुरा निर्भर रहन्छ।

फ्लर्ट गर्न कत्तिको माहिर हुनुहुन्छ ?

म फ्लर्ट गर्दिनँ, कोही मनपर्छ भने मनपर्छ, पर्दैन भने पर्दैन।

जीवनमा गरेको सबैभन्दा ठूलो गल्ती ?

एकपटक भाइसँग एकदमै नराम्रो झगडा परेको थियो, त्यो बेला उसलाई हात उठाएकी थिएँ, अहिले रिग्रेट फिल हुन्छ।

पैसा कमाउन किन यति धेरै गाह्रो भएको होला ?

सबैलाई पैसा चाहिएको भएर पनि कमाउन गाह्रो भएको हो।

रिमाको जीवनमा विवाहले कत्तिको महत्त्व राख्छ ?

सोच्न भ्याएकी छैन, जिन्दगीमा विवाहबाहेक अरू धेरै अनुभव र उपलब्धि हासिल गर्न बाँकी नै छ।

पहिलो पटक कहिले विवाह गर्ने रहर जाग्यो ?

हरेक पटक शाहरुख खानको फिल्म हेर्दा, ऊसँग विवाह गर्ने रहर जागेर आउँछ।

अहिलेका युवतीहरू मनभन्दा धन भएको केटा रोज्छन् रे ?

म त मन भएकै रोज्छु, धन त एक दिन सकिन पनि सक्छ तर मनमा भएको माया अजम्बरी रहन्छ, हातको मैला सुनको थैला के गर्नु धनले, साग र सिस्नु खाएको बेस आनन्दी मनले, होइन ?

यौन मनोविज्ञान

गृहपृष्ठ » » यौन मनोविज्ञान » लेखहरु »

यौनसम्पर्कमा तिमी परिपक्व छौ भन्ने उसको भनाइ

म १९ वर्षीय अविवाहित युवती हुँ। मैले अहिलेसम्म दुई जना केटासँग यौनसम्पर्क गरिसकेकी छु। पहिलोले मसँग धेरै नै प्रतिबद्धता व्यक्त गरेको थियो। त्यो उसले पूरा गरेन। कुनै दिन अर्कै केटी साथीसँग रमाइलो गरेर हिँडेको देखेपछि मैले उससँगको सम्बन्ध तोडिदिएँ। मैले केही समयको अन्तरालपछि अर्को विश्वासिलो साथी फेला पारेकी छु र ऊसँग जुनसुकै मूल्य चुकाएर पनि सम्बन्ध राम्रो बनाउन चाहन्छु, तर एउटासँग धोका पाएकाले मलाई अर्कोसँग पनि पूरै विश्वास भने लागेको छैन। कम उमेर भए पनि एकातिर मैले कुमारित्व गुमाइसकेकी छु। यसले मलाई बेलाबखत झस्का दिइरहन्छ। यौनसम्पर्कमा तिमी परिपक्व छौ भन्ने उसको भनाइले पनि मलाई कहिलेकाहीं झस्काउँछ। नयाँ प्रेमीसँगको सम्बन्ध नराम्रो होला कि भन्ने चिन्ताले सताइरहन्छ। किनभने सधैं केटा फेर्दै हिँड्ने जस्तो देखिएला र समाजमा अप्ठेरो स्थिति आउला भन्ने त्रास पनि छ। विगतको घटनालाई सम्झेर पश्चाताप मानिरहने मेरो यो स्वाभावमा कसरी सुधार ल्याउने ? मनोविज्ञानका हिसाबले मेरो मनस्थितिलाई कस्तो अवस्थामा राखेर मूल्यांकन गर्न सकिन्छ ?

पी.

तपाईं १९ वर्षअघि नै दुई जनासँगको प्रेममा परिसक्नुभएको रहेछ। जीवनमा टिनएज अर्थात् १९ वर्षभन्दा कम उमेरमा विपरीत लिंगप्रति आकषिर्त हुनु स्वाभाविक हो। यो उमेरमा हामीलाई धेरै कुरा थाहा पनि हुँदैन। कसैप्रतिको आकर्षण र वास्तविक प्रेमसम्बन्ध फरक कुरा हुन्। यो उमेरमा भएका घटना अस्वाभाविक होइनन् तर प्रेम र यौनका गतिविधिहरूमा हामीले देश, समाज र परिवेशले निर्धारण गरेको मापदण्डअनुसार आफूलाई समायोजन गर्नुपर्ने हुन्छ। यसअन्तर्गत आफ्ना व्यक्तिगत मापदण्ड बनाउन सकिन्छ। प्रेम र यौनका सम्बन्धमा आफैंले एकपटक गम्भीर भएर सोचेर अघि बढ्ने कि नबढ्ने भन्ने परिपक्व निर्णय गर्न मद्दत पुग्छ। सामान्य रूपमा सोच्दा पनि हामीले अहिलेको सूचना-प्रविधिको विकासलाई सदुपयोग गरिरहेका छैनौं। आफ्ना राम्रा पक्षमा गौरव गर्न छोडेका छौं। तिनलाई जोगाइराख्न सकिरहेका छैनौं, तर संसारका नराम्रा कुरा हामी छिटै ग्रहण गरिरहेका हुन्छौं। एकछिन् गम्भीर भएर नियालौं त, अहिलेको समय आफ्ना राम्रा कुराको सूची बनाएर तिनलाई भरसक नघटाउने र संसारका राम्रा पक्ष सिकेर आफ्नो विद्यमान ज्ञानको भण्डार बढाउँदै लाने होइन र ?

जहाँसम्म पुराना घटनाप्रति पश्चातापको कुरा छ, यसरी पश्चाताप गर्नेमा तपाइर्ं मात्र एक्लो हुनुहुन्न। यो उमेरमा कुमारित्व गुमाएकोमा धेरैलाई पश्चाताप हुन्छ। त्यसमाथि पनि गलत मानिससँग त्यस्तो सम्बन्ध भएको घट्नाप्रति पश्चाताप मान्नेहरूको सूची लामै छ। उक्त घटनाले पटक-पटक घचघच्याइरहन्छ। यो स्वाभाविक पनि हो, तर तपाईंले त्यो घटनाबाट शिक्षा लिनुभएको छ कि छैन भन्ने पक्षचाहि महत्वपूर्ण कुरा हो। मनोविज्ञानका हिसाबले आफ्नो पुरानो घटनालाई छलफलमा ल्याएर समाधान खोज्नु नै एक कदम अघि बढ्नु हो। यसबाट पाठ सिकेर आगामी दिनमा यस्ता घटना रोक्नुभयो भने यसलाई शिक्षाका रूपमा नै लिनुपर्ने हुन्छ। घट्ना दोहोर्‍याइरह्यो भने मात्र समस्या बढ्दै जान्छ।

मानव सभ्यताको उचाइ प्राप्त गरेको अमेरिकामा पनि मानिसहरूमा लभ, सेक्स र रोमान्सप्रति पश्चाताप हुने गरेको छ। धेरैजसो अमेरिकीले नयाँ वर्षको तिम्रो एजेन्डा के छ भनेर सोध्यो भने यही लभ, सेक्स र रोमान्सप्रति विगतमा भएका आफ्ना कमजोरी नदोहोर्‍याउने वाचा गरेको अनुसन्धानहरूले देखाएका छन्।

टिन एज केही खतरनाक हुने भएकाले यो उमेरलाई पश्चातापको भुमरीमा धकेल्नबाट जोगाउनेहरूले नै पछि लभ, सेक्स र रोमान्सको जीवन सुखमय बनाउन सक्छन्। केटा मानिसहरूले कुनै बेला आफूसँग जम्काभेट भएकी आकर्षक युवतीसँग प्रेमप्रस्ताव राख्न नसकेकोमा पश्चाताप मान्ने गरेका छन्। उनीहरूले त्यसरी मौका पाएका युवतीसँग यौनसम्पर्क गर्न नपाएकोमा पश्चाताप मान्ने गरेको पाइन्छ। धेरैजसो युवतीले भने छिट्टै कसैलाई विश्वास गरेर यौनसम्पर्क गरेकोमा दुःख प्रकट गर्ने गरेका छन्। त्यसमाथि पनि माथि भनिएजस्तै गलत व्यक्तिसँग आफ्नो भर्जिनिटी गुमाएकोमा उनीहरूलाई बढी पश्चाताप हुने गरेको छ। केटाहरू क्याजुअल सेक्स मन पराउँछन्। अल्पकालीन सम्बन्ध मन पराउँछन्, तर केटीहरू जीवन बिताउन केटाहरूसँग दीर्घकालीन प्रतिबद्धता चाहन्छन्। केटाहरू सेक्सपछि लभ गर्ने खालका हुन्छन् भने केटीहरू लभपछि सेक्स चाहन्छन्। केटीहरू यौन सम्पर्कमा छनौटपूर्ण हुन्छन्। किनभने बच्चा जन्माउनु, हुर्काउनु र उनीहरूसँग समय बिताउनु केटी मानिसका लागि जैविक, भावनात्मक र प्रजननजन्य कुरा हुन पुग्छ। सिद्धान्ततः केटाहरूले चाहे एकैदिनमा धेरैलाई गर्भवती बनाउन सक्छन्, अर्थात् केटी मान्छेको यो धर्तीमा बेग्लै भूमिका छ। तैपनि कहिलेकाहीं केटी मान्छेहरू कुनै केटासँग अन्जानमा र प्रेम भएको भ्रमका आधारमा फस्छन् र कुमारित्व गुमाउँछन्। भर्जिनिटी र प्रजनन केटी मानिसका लागि जीवनका दुई महत्त्वपूर्ण सम्पत्ति हुन्। यी दुई चीज गुमाउँदा केटी मानिसलाई जीवनमा सबैभन्दा ठूलो निराशा पैदा हुन्छ। कुमारित्व गुमाउँदा ठूलो पश्चाताप हुन्छ भने प्रजनन क्षमता गुमाउँदा ठूलो निराशा। यो स्वाभाविक हो। समयक्रमसँगै सकिने प्रजनन् क्षमता र कुमारित्व टार्न सकिँदैन, तर गलत मानिसबाट कुमारित्व गुमाउने काम रोक्न सकिन्छ। अब तपाइर्ंसँग गुमेको कुरा बाँकी छैन। विगतका घटनाप्रति पश्चाताप गरिरहने भन्दा पनि विगतका त्यस्ता घटनाबाट पाठ सिकेर नयाँ प्रेमीसँग रमाइलोसँग जीवन बिताउन सकिने उपलब्ध सम्भावनातर्फ केन्दि्रत हुनुहोस्। निरन्तर आइरहने पश्चातापबाट जोगिन मनोविद्हरूसँग सम्पर्क राख्न सक्नुहुन्छ। 

पहिलो विश्व

गृहपृष्ठ » » पहिलो विश्व » लेखहरु »

रेकर्डका लागि अन्डरवेयर

हालै न्युयोर्कको टाइम स्क्वायरमा अनौठो दृश्य देखियो। असंख्यौं युवा-युवती एकाएक सडकमा ओर्लिए। अनपेक्षित बढेको उक्त भीडले मात्र होइन, उनीहरूको पहिरनले पनि दर्शकको ध्यान खिच्यो। भीडमा उपस्थित सबैले अन्डरवेयर मात्र लगाएका थिए। यो अनौठो तामझामको उद्देश्य विश्व रेकर्ड कायम गर्नु रहेछ। यसअघि २ हजार २ सय ७० जना यसरी अन्डरवेयरमा एकत्रित भएर विश्व रेकर्ड बनाएका थिए। पछिल्लो भेला त्यही रेकर्ड तोड्न जुटेको थियो।

विदेशबाट

गृहपृष्ठ » » विदेशबाट » लेखहरु »

रिहान्नाकै चर्चा

सांगीतिक व्यस्तताबीच बिदा मनाउन आफ्नो देश पुगेकी गायिका रिहान्ना स्वदेश पुगेर समेत चर्चामा आइन्। बारबाडोसस्थित आफ्नो निवासमा आराम गर्न गएकी रिहान्नाले आफ्ना केही कामुक तस्बिर आफैंले खिचेर इन्टाग्राममार्फत सार्वजनिक गरिन्। परिवारका सदस्यहरूसँग रमाइलो गर्न गएकी रिहान्नाले अपलोड गरेका अधिकांश तस्बिरमा उनले बिकिनी लगाएकी छिन्। अर्धनग्न तस्बिरहरू आफैंले सार्वजनिक गरेपछि रिहान्नाले प्रशंसकहरूको आलोचना पनि सहनुपरेको छ। अहिले सामाजिक सञ्जालहरूमा रिहान्नालाई गाली गर्नेहरूको संख्या बढ्दो छ।